Evrópuleiðtogar æfir af reiði í garð Moody´s

Ýmsir leiðtogar í Evrópulöndum og í framkvæmdanefnd ESB eru æfir af reiði í garð matsfyrirtækisins Moody´s fyrir að hafa lækkað lánshæfiseinkunn Portúgal niður í ruslflokk.

Fjallað er um málið í Jyllands Posten en eins og fram kom í fréttum í morgun lækkaði Moody´s lánshæfi Portúgals um fjóra flokka niður í Ba2 með neikvæðum horfum. Ástæðan var m.a. að Moody´s telur að Portúgal, eins og Grikkland, þurfi meiri neyðaraðstoð en landið hefur þegar fengið.

José Manuel Barroso formaður framkvæmdanefndar ESB segist harma ákvörðun Moody´s, einkum tímasetninguna og umfang lækkunarinnar á lánshæfinu. Barroso telur að ákvörðun Moody´s skapi meira öngþveiti en skýrleika á mörkuðum.

Talsmaður Olli Rehn stækkunarstjóra ESB segir að ferlið sé allt hið óheppilegasta og það veki að nýju upp spurningar um starfshætti matsfyrirtækjanna.

Stavros Lambrindinis fjármálaráðherra Grikklands segir ákvörðun Moody´s hreina geðveiki og bendir á að ákvörðun matsfyrirtækisins geti ein og sér valdið því að Moody´s hafi svo rétt fyrir sér að lokum.

Wolfgang Schäuble fjármálaráðherra Þýskalands segir að tími sé kominn á uppgjör gagnvart matsfyrirtækjunum sem myndi minnka völd þeirra og áhrif.

Ákvörðun Moody´s hefur valdið því að gengi evrunnar hefur lækkað gagnvart dollar. Skuldatryggingaálag Portúgals hefur rokið upp um nær 100 punkta í morgun og stendur nú í 864 puntkum. Hefur það aldrei verið hærra í sögunni.

Þá hefur ákvörðun Moody´s valdið því að Portúgal hefur orðið fyrir þungu höggi á skuldabréfamarkaðinum. Ávöxtunarkrafan á ríkisskuldabréfum Portúgals hefur hækkað um 224 punkta á 2ja ára bréfum og stendur í 15,9%. Á tíu ára bréfum hefur krafan hækkað um 128 punkta og stendur í 12,3%.