Farþegafjöldi Icelandair eykst um 21% milli ára

Icelandair flutti 213 þúsund farþega í júní sem er 21% aukning frá síðasta ári. Sætanýtingin nam 80,8% og stóð í stað á milli ára.

Þetta kemur fram í tilkynningu um flutningstölur félagsins til Kauphallarinnar.Farþegum Flugfélags Íslands fækkaði á sama tíma um 3% á meðan sætanýtingin jókst og nam 70,5%. Flugi til Vestmannaeyja var hætt á árinu 2010 og skekkir það samanburð. 

Flug félagsins til Grænlands hefur gengið vel og nemur farþegaaukning 25% á milli ára.

Seldir blokktímar í leiguflugsverkefnum drógust saman um 1% á milli ára. Seldir blokktímar jukust í verkefnum á vegum Loftleiða-Icelandic, en fækkaði hjá Icelandair Cargo vegna viðhaldsskoðana. 

Flutt frakt jókst um 4% sem skýrist af auknum innflutningi til Íslands. Nýting á hótelunum nam 72,6% og jókst í samanburði við júní í fyrra. Fjöldi framboðinna herbergja jókst um 12%, en á Akureyri var opnað nýtt hótel í mánuðinum.