Beckenbauer: Mario Götze er okkar Messi

Þýska goðsögnin Franz Beckenbauer er yfir sig hrifinn af Mario Götze hjá þýsku meisturunum í Borussia Dortmund. Götze er 19 ára gamall og er í landsliðshóp Þjóðverja í vináttulandsleiknum á móti Brasilíu í vikunni.

„Það er ekki mögulegt að stoppa Mario Götze og hann býr þar yfir sömu hæfileikum og Messi," sagði Beckenbauer en Götze var í stuði í 3-1 sigri Borussia Dortmund á Hamburg í fyrstu umferð þýsku deildarinnar um síðustu helgi.

Mario Götze lagði upp fyrsta markið og skorað síðan annað markið sjálfur. „Það er enginn að spila betur en hann. Hann hleypur framhjá varnarmönnunum eins og þeir séu ekki þarna. Hann hefur einstaka tilfinningu fyrir fótboltanum alveg eins og Messi," sagði Beckenbauer.

Götze var með 6 mörk og 15 stoðsendingar í 33 leikjum með Dortmund á síðasta tímabili og hjálpaði liðinu að tryggja sér þýska meistaratitilinn.