Vandinn í Evrópu bráðari en í Bandaríkjunum

Matsfyrirtækið Standard og Poors lækkaði lánshæfismat Bandaríkjanna úr efsta þrepi í næstefsta seint í gærkvöld. Ólafur Ísleifsson hagfræðingur segir að afleiðingarnar verði fyrst og fremst pólitískar. Skuldavandinn í Evrópu sé mun bráðari en skuldavandinn í Bandaríkjunum.

Pólitíkusar eru þegar farnir að takast á um málið vestanhafs. Jim DeMint, öldungadeildarþingmaður úr röðum repúblikana, krefst þess að Obama forseti víki Timothy Geithner fjármálaráðherra úr embætti og setji annan í hans stað sem geti komið lagi á fjármálin og stuðli að fjölgun starfa. Harry Reid, leiðtogi Demókrata í öldungadeildinni, segir hins vegar að lánshæfismatseinkunnin sýni þörfina á því að ná tökum á ríkisfjármálunum með samblandi af niðurskurði á ríkisútgjöldum og tekjuaukningu.

Ólafur Ísleifsson hagfræðingur segir að öððrum þræði sé þetta pólitískt mál í Bandaríkjunum og muni ekki snerta Íslendinga beint. Það snúist að miklu leyti um svokallað skuldaþak sem Íslendingar hafi ekki. Málið sé því að mörgu leyti óskiljanlegt fyrir Íslendinga. Að auki blandist inn þetta átök um það hvort takast eigi við ríkisfjármál með skattahækkunum eða niðurskurði.

Ólafur segir að meira aðkallandi sé að takast á við skuldavandann í Evrópu og þau vandræði geti snert Íslendinga beint. Til dæmis muni breytingar á gengi evrunnar hafa áhrif á Íslendinga. Þá geti aðgangur Íslendinga að lánsfé minnkað ef aðgangur að lánsfé í Evrópu verður takmarkaðra.