Íslenska leiðin var bara ódýrari en sú írska

Ekkert land eyddi jafnmiklu í bankakerfið og Ísland, að frátöldu Írlandi, á árunum 2007 til 2009 vegna alþjóðlegu fjármálakreppunnar. Þetta kemur fram í nýlegri skýrslu OECD um Ísland, en fjallað er um málið í nýjasta tölublaði Vísbendingar, vikurits um viðskipti og efnahagsmál.

Fjármálakreppan á árunum 2007 til 2009 kostaði írska ríkið langmest, eða sem nemur 49 prósentum af landsframleiðslu. Kostnaður Íslendinga samkvæmt OECD var hins vegar 20,3 prósent af landsframleiðslu. Sú tala er þó nær örugglega of lág því hið opinbera hefur lagt meiri peninga inn í bankakerfið frá árinu 2009, svo sem til Íbúðalánasjóðs.

Þau ríki sem koma næst á eftir Íslandi eru Holland, Bretland og Lúxemborg með kostnað upp á 12,9 prósent, 8,7 prósent og 7,7 prósent af landsframleiðslu. Kostnaður annarra ríkja var undir fimm prósentum af landsframleiðslu.

Í Vísbendingu er þeirri spurningu velt upp hve miklu meiri kostnaður íslenska ríkisins hefði verið ef ákveðið hefði verið að verja bankakerfið til þrautar. Er það mat greinarhöfundar að lán til Kaupþings daginn fyrir hrun bankans og hugmyndir um að ríkið keypti 75 prósenta hlut í Glitni sýni að ráðamenn hafi ekki gert sér grein fyrir því hve alvarleg staðan hafi verið. Það hafi því reynst Íslendingum lán í óláni hve tregar aðrar þjóðir reyndust til að lána Íslendingum haustið 2008.

Sú kenning að Íslendingar hafi sloppið vel vegna ákvörðunar um að leyfa bönkunum að falla eigi hins vegar ekki við rök að styðjast.