Enn veldur Tiger Woods vonbrigðum

Bandaríski kylfingurinn Tiger Woods er úr leik á PGA-meistaramótinu í golfi í Atlanta. Woods var samtals á tíu höggum yfir pari eftir tvo fyrstu hringina og var langt frá því að komast í gegnum niðurskurðinn.

Tiger spilaði hringinn í gær á 73 höggum eða fjórum yfir pari vallarins. Hringinn á fimmtudaginn spilaði hann á 75 höggum eða sex yfir. Samanlagt var hann því á 10 höggum yfir en spila þurfti á fjórum höggum yfir pari eða betur til þess að komast í gegnum niðurskurðinn.

Bandaríkjamennirnir Jason Dufner og Keegan Bradley eru með forystu á mótinu. Þeir fóru á kostum í gær og eru á fimm höggum undir pari. Ástralinn Adam Scott, með fyrrverandi kylfusvein Woods Steve Williams, er í ellefta sæti á einu höggi undir pari.

Keppni heldur áfram í dag.