Launahækkanir ekki í takt við aðstæður

Sú hækkun sem orðið hefur á launum í kjölfar kjarasamninga er ekki í takti við þær aðstæður sem eru  á vinnumarkaði  hér á landi. Vinnumarkaði sem einkennist enn af töluverðu atvinnuleysi, auk þess sem fjárhagsleg staða og rekstrarumhverfi margra fyrirtækja er enn afar erfitt.

Þetta kemur fram í Morgunkorni greiningar Íslandsbanka þar sem fjallað er um frétt Hagstofunnar í morgun um þróun launavísitölunnar.

Greiningin segir að ætla megi að fyrirtækin  neyðist til þess að velta stórum hluta aukins kostnaðar sem fylgir kjarasamningum út í verðlag, sem augljóslega leiðir til meiri verðbólgu hér á landi en ella. Er því nokkuð líklegt að sú jákvæða þróun sem orðið hefur á kaupmætti á síðustu mánuðum snúist upp í andhverfu sína á næstu mánuðum.

Þó ræðst þróun verðlags hér á landi augljóslega af fleiri þáttum en framangreindu, og má hér einna helst nefna gengisþróun krónu, verðþróun á hrávörumörkuðum erlendis og þróun húsnæðisverðs.

Á sama tíma og launavísitalan hækkaði um 1,0% á milli mánaða hækkaði vísitala neysluverðs um 0,1%. Jókst því kaupmáttur launa um 0,9% nú í júlí síðastliðnum frá fyrri mánuði. Þetta er þriðji mánuðurinn í röð sem kaupmáttur launa eykst hér á landi og frá sama tíma í fyrra hefur kaupmáttur launa hækkað um 2,6%, en að júní síðastliðnum undanskildum hefur kaupmáttur launa ekki aukist svo hratt síðan seint á árinu 2007.

Vísitala kaupmáttar stendur nú í 110,5 stigum og hefur hækkað um 6,4% frá því hún náði sínu lægsta gildi eftir hrun sem var í maí á síðasta ári. Er kaupmáttur launa nú svipaður og hann var í byrjun árs 2005.