Ný stjórn Byggðastofnunnar

Á ársfundi Byggðastofnunar sem haldinn er í dag á Sauðárkróki tók við ný stjórn stofnunarinnar. Nýja stjórnin er skipuð af Katrínu Júlíusdóttur, iðnaðarráðherra.

Í tilkynningu segir að það sé í samræmi við álit ríkisendurskoðunar frá árinu 1996 en þar var lagt til að komið yrði á beinu stjórnsýslusambandi milli ráðherra og stofnunarinnar. Samkvæmt því skal ráðherra skipa beint í stjórn stofnunarinnar þar sem hann/hún ber ábyrgð á stofnuninni og gagnvart Alþingi samkvæmt ráðherraábyrgð.

Í nýju stjórninni eiga sæti þau Þóroddur Bjarnason prófessor á hug- og félagsvísindasviði Háskólans á Akureyri en hann er jafnframt formaður stjórnarinnar, Ásta Dís Óladóttir framkvæmdastjóri Fríhafnarinnar, Guðmundur Gíslason framkvæmdastjóri Gámaþjónustu Austurlands, Gunnar Svavarsson sjálfstætt starfandi ráðgjafi, Sigurborg Kr. Hannesdóttir framkvæmdastjóri ráðgjafafyrirtækisins Ildi, Valdimar Hafsteinsson framkvæmdastjóri Kjöríss og Ólöf Hallgrímsdóttir, ferðaþjónustubóndi á Vogum í Mývatnssveit.

Varamenn í stjórn eru Þorsteinn Gunnarsson f.v. rektor Háskólans á Akureyri, Þorkell Sigurlaugsson framkvæmdastjóri fjármála- og þróunarsviðs Háskólans í Reykjavík, Bergsteinn Einarsson, framkvæmdastjóri Set ehf., Matthildur Helgadóttir Jónudóttir framkvæmdastjóri Tölvuþjónustunnar Snerpu, Jóna Árný Þórðardóttir greiningarsérfræðingur innra eftirlits hjá Alcoa Fjarðaáli, Laufey Helgadóttir hótelhaldari á Hótel Smyrlabjörgum, Guðrún Þóra Gunnarsdóttir lektor við Háskólann á Hólum.