Segja viðbrögðin við Kínverjanum bera vott um kaldastríðshugsun

Alþjóðlega umræðan sem fyrirhuguð viðskipti Nubos á Íslandi hefur vakið upp bendir til þess að Kínverjar eigi langt í land með að ná fótfestu á alheimsmörkuðum. Þetta er í það minnsta álit kínverska blaðsins China Daily sem kemur fram í grein á vef blaðsins undir yfirskriftinni Kaldastríðsháttur að baki samsæriskenningum um kínversk utanríkisviðskipti. Blaðið segir að þeir þröskuldar sem Kínverjar standi frammi fyrir verði hugsanlega ekki auðveldlega yfirstignir og minni fólk á að það eru skýr skil á milli austurs og vesturs.

Blaðið segir að mjög margar fyrirætlanir kínverskra fyrirtækja hafi mætt sömu torgtryggni og Shongkung Investment Group, fyrirtæki Nubos, stóð frammi fyrir, þegar það hugðist kaupa jörð á Íslandi.

Fjölmiðlar hafi gert að því skóna að það væru tengsl milli fyrirtækisins og kínverskra stjórnvalda þótt einu tengslin væru að Nubo hefði einhvern tímann unnið fyrir kínversk stjórnvöld.

Blaðið segir ljóst að hann hafi unnið fyrir Kommúnistaflokkinn og kínversku ríkisstjórnina á níunda áratugnum en hann hafi hætt þeim störfum snemma á tíunda áratugnum.

China Daily segir að Nubo sé nýjasta dæmi, en alls ekki það fyrsta, um tortryggni gagnvart kínverskum fjárfestum á alþjóðamarkaði. Huawei, sem sé einkarekið tölvufyrirtækið í suðurhluta Kína, hafi mætt svipuðu viðmóti þegar fyrirtækið hafi reynt að hasla sér völl í öðrum ríkjum.

Blaðið bendir á að kínverskir fjárfestar séu nýliðar á alþjóðamörkuðum og efasemdir um þá séu svo sem skiljanlegar. Það taki alltaf tíma að byggja upp trúverðugleika. En að halda því fram að viðskiptahugmyndir séu alltaf byggðar upp á pólitískum hvötum geri slíka uppbyggingu á trausti mun erfiðari.