Framtakssjóður kaupir í N1 - stefnt að skráningu í kauphöll

Framtakssjóður Íslands hefur keypt 15,8% hlutafjár í verslunar- og þjónustufyrirtækinu N1 af Íslandsbanka hf. og Glitni.  Í tilkynningu segir að jafnframt hafi Framtakssjóðurinn gert samkomulag við Íslandsbanka hf. og nokkra aðra aðila, meðal annars lífeyrissjóði sem eiga fyrir hlut í N1, um að leggja hlutabréf sín inn í sameiginlegt félag. „Það félag mun fara með meirihluta hlutafjár í N1 og leiða áfram þróun og uppbyggingu félagsins. Stefnt er að skráningu N1 í kauphöll á árinu 2013,“ segir ennfremur.

Í viðskiptunum nú kaupir Framtakssjóður alls um 10,3% hlutafjár í N1 af Skilanefnd Glitnis og um 5,5% af Íslandsbanka. „Eftir viðskiptin á Skilanefnd Glitnis ekki hlut í N1. Endanlegt kaupverð Framtakssjóðsins mun ráðast af niðurstöðu rekstrar á árinu 2011 en tekur mið af heildarvirði félagsins við fjárhagslega endurskipulagningu þess. Viðskiptin eru háð samþykki Samkeppniseftirlitsins.“

Finnbogi Jónsson, framkvæmdastjóri Framtakssjóðs Íslands segist telja N1 góðan fjárfestingarkost og að spennandi sé fyrir Framtakssjóðinn að koma að þessu verkefni. „N1 er eitt af fjölmörgum lykilfyrirtækjum í íslensku viðskiptalífi sem hafa að stærstum hluta endað í eigu banka í kjölfar efnahagshrunsins. Framtakssjóðurinn vill vera leiðandi aðili við að efla fyrirtækið, breikka eignarhald þess og stefna að skráningu félagsins á hlutabréfamarkað. Efnahagur N1 er nú traustur og við teljum góð tækifæri í rekstrinum. Fyrirtækið hefur sterka markaðsstöðu, öflugt dreifikerfi og hefur leikið mikilvægt hlutverk í íslensku atvinnulífi, ekki síst á landsbyggðinni. Það er afar mikilvægt að nýta þessa sterku stöðu til að þjóna viðskiptavinum og hámarka arðsemi allra hluthafa."