Forseti Bayern München telur að þýska deildin sé sú sterkasta

Uli Höness forseti þýska stórliðsins Bayern München henti ágætri sprengju inn í fótboltaumræðuna um helgina þegar hann sagði að enska úrvalsdeildin væri sú þriðja sterkasta í heiminum. Að mati Höness er spænska deildin sú sterkasta og að hans mati koma Þjóðverjar þar á eftir.

„Eins og staðan er dag erum við númer tvö á eftir Spáni, það er langt síðan við fórum framúr Ítalíu,“  sagði Höness í viðtali við Bild.

Ef miðað er við gögn frá Knattspyrnusambandi Evrópu, þá eru Höness á allt annarri skoðun. UEFA hefur reiknað það út að enska úrvalsdeildin sé sú sterkasta, Spánn kemur þar á eftir, Þjóðverjar í því þriðja og Ítalía í fjórða sæti.

„Ef ég tek mið af þeirri breidd sem er í efstu deild í Þýskalandi þá erum við með sterkustu deildina í heimi,“ sagði hinn 59 ára gamli Höness en hann var í heimsmeistaraliði Þjóðverja árið 1974.

Þýskt lið hefur ekki unnið Meistaradeildina frá árinu 2001 en þýsk lið hafa náð góðum árangri í Evrópukeppnum undanfarin ár og styrkt stöðu deildarinnar á lista UEFA. Schalke komst í undanúrslit Meistaradeildarinnar s.l. vor þar sem liðið tapaði gegn Manchester United. Árið 2010 komst Bayern München í úrslitaleikinn gegn Inter frá Ítalíu sem sigraði.