Íslensk dagskrárgerð er styrkur Stöðvar 2

"Íslandsbanki og Íþróttabandalag Reykjavíkur hafa átt í samstarfi um Reykjavíkurmaraþonið undanfarin átta ár. Þetta er eitt af þeim verkefnum sem bankinn er hvað stoltastur af að tengjast og hefur alltaf lagt mikinn metnað í. Eitt af því var að bjóða upp á vefinn www.hlaupastyrkur.is síðastliðið ár. Þar gefst fólki tækifæri á að hvetja hlaupara og leggja um leið sitt að mörkum við að leggja góðum málefnum lið," segir Hólmfríður Einarsdóttir, markaðsstjóri Íslandsbanka.

"Við ákváðum að leita nýrra leiða og hófum samstarf við Stöð 2 til að kynna þetta verðuga verkefni í sameiningu. Ísland í dag setti upp skemmtilega keppni milli tveggja liða sem voru mönnuð þjóðþekktum persónum sem ákváðu að safna áheitum fyrir góð málefni.

Er skemmst frá því að segja að árangurinn lét ekki á sér standa, þjóðin tók höndum saman og safnaði áheitum sem aldrei fyrr. Við vorum í sjöunda himni þegar við héldum uppskeruhátíðina með ÍBR í byrjun september og færðum við góðgerðarfélögum landsins söfnunarfé að upphæð 43.654.858 kr. sem hlauparar höfðu safnað.

Við heyrðum jafnframt að svo mikil hlaupastemning hefði skapast meðal starfsfólks Stöðvar 2 að erfitt hefði reynst að manna vaktir á maraþondeginum!"

- Hverjir eru styrkleikar Stöðvar 2 sem auglýsingamiðils?

"Ég myndi tvímælalaust segja að íslensk dagskrágerð væri helsti styrkur Stöðvar 2. Þarna hefur hvert stórvirkið á fætur öðru sprottið fram og skemmt þjóðinni. Dagskráin er jafnframt mjög fjölbreytt og nær því til mjög breiðs aldurshóps, þannig að allir ættu að geta fundið eitthvað við sitt hæfi í erlendum framhaldsþáttum, upplýsandi fréttaskýringarþáttum og síðast en ekki síst nýjustu bíómyndunum. Ég sem markaðsmanneskja fagna líka þeirri nýbreytni stöðvarinnar að bjóða upp á auglýsingar inni í þáttum, það gefur okkur auglýsendum alveg nýja leið að markhópnum sem er sífellt erfiðara að ná í."