Frammistaða Neuer framar björtustu vonum

Markvörðurinn Manuel Neuer hefur heldur betur byrjað með látum hjá Bayern Munchen. Hann fær varla á sig mark og setti met um daginn er hann hélt markinu hreinu í 1018 mínútur. Gamla metið átti Oliver Kahn en það met var 1011 mínútur.

Neuer hefur mátt þola ýmislegt síðan hann gekk í raðir Bayern og meðal annars mótmæli frá harðkjarnastuðningsmönnum félagsins. Hann hefur samt ekkert látið það á sig fá.

Stjórnarformaður félagsins, Karl-Heinz Rummenigge, segir að frammistaða Neuer sé framar björtustu vonum.

"Hann hefur sýnt ótrúlegan styrk og aðlagast afar fljótt. Frammistaða hans er framar okkar björtustu vonum," sagði Rummenigge.

"Það er ótrúlegt að hann hafi aðeins fengið eitt mark á sig í átta leikjum í deildinni. Það segir sína sögu."