Aukning farþega og flugvéla eykur tekjur Isavia

Aukin farþegaumferð um Keflavíkurflugvöll og flugumferð yfir Norður Atlantshafið hefur komið Isavia verulega til góða í ár. Þessi aukna umferð farþega og flugvéla skilaði hátt í 800 milljónum króna í auknar tekjur hjá Isavia á fyrstu sex mánuðum ársins samanborið við sama tímabil í fyrra.

Í tilkynningu um rekstur Isavia kemur hinsvegar fram að þrátt fyrir þessa góðu tekjuaukningu var heildarafkoma Isavia neikvæð um tæpan hálfan milljarð króna fyrstu sex mánuði ársins en rekja má þennan taprekstur til gengistaps sem nam rúmum 800 milljónum króna á tímabilinu.

Þótt rekstur félagsins sé góður er niðurstaðan neikvæð sökum mikillar skuldsetningar og nægja tekjur ekki til nauðsynlegrar uppbyggingar og framþróunar. Ljóst er að enn um sinn muni ríkissjóður verða að fjármagna sérstaklega öll stærri verkefni við endurbætur og uppbyggingu flugvallarmannvirkja og flugleiðsögubúnaðar svo fullnægjandi framþróun og öryggi í flugsamgöngum verði tryggð með bestum hætti.

Rekstrarhagnaður fyrir fjármagnsliði jókst um 246 milljónir króna milli ára en þess ber að geta að afkoma félagsins er jafnan betri á síðari hluta ársins. Vel heppnað markaðsstarf flugfélaganna og átakið „Inspired by Iceland" hefur skilað umtalsverðri farþegaaukningu á Keflavíkurflugvelli það sem af er seinni helmingi þessa árs.

Rúmt ár er nú liðið frá sameiningu opinberu hlutafélaganna Flugstoða og Keflavíkurflugvallar í Isavia ohf. Dótturfélag Flugstoða, Flugfjarskipti, sameinaðist félaginu 1. júlí 2010. Helsta markmiðið með sameiningu félaganna var að skapa sterkari einingu sem yrði betur í stakk búin til að bregðast við tækifærum og eða ógnunum sem framtíðin bæri í skauti sér. Rekstur félagsins var endurskipulagður og er það mat stjórnar félagsins að vel hafi tekist til.

Beinn fjárhagslegur ávinningur af sameiningunni er metin á rúmlega 200 milljónir en auk þess sýna rekstrartölur fyrstu mánuði ársins að aðhaldsaðgerðir og stefnumörkun félagsins í ársbyrjun hefur skilað góðum árangri, að því er segir í tilkynningunni.