Framtakssjóðurinn hagnast vel

Framtakssjóður Íslands hefur hagnast vel á fjárfestingu sinni í Icelandair Group, sem hann tilkynnti um í morgun að hann væri að selja 10% hlut í. Framtakssjóðurinn keypti tæplega 30% hlut í félaginu fyrir 3,6 milljarða króna á genginu 2,5. Hann hyggst nú selja í félaginu á genginu 5,42.

Nokkurt líf er nú að færast í hlutabréfamarkaðinn í Kauphöll Íslands eftir mikla ládeyðu frá hruni bankanna. Fjárfestar sem tóku þátt í endurreisn Icelandair Group á markaðinn, eftir endurskipulagningu, hafa fengið góða ávöxtun á bréf sín.

Í desember verða síðan hlutabréf í Högum tekin til viðskipta en þá hyggst Arion banki selja 20 til 30% hlut í Högum er það verður skráð á markað.