Redknapp getur ekki stýrt Spurs á morgun

Harry Redknapp, stjóri Tottenham, verður fjarri góðu gamni á morgun þegar Spurs mætir Rubin Kazan í Evrópudeildinni.

Redknapp er á leið í einhverja læknismeðferð en ekki hefur verið gefið upp hvers konar. Málið er í það minnsta það alvarlegt að hann ferðast ekki með liðinu.

Kevin Bond aðstoðarstjóri og Joe Jordan varaliðsþjálfari munu stýra liðinu í fjarveru Redknapp.

Spurs er á toppi A-riðils fyrir leikinn með tveimur stigum meira en gríska liðið PAOK.