Þjálfari Hoffenheim: Gylfi þarf á marki að halda

Gylfa Þór Sigurðssyni hefur ekki enn tekist að skora mark á leiktíðinni í þýsku úrvalsdeildinni en hann var markahæsti leikmaður liðsins á síðasta tímabili.

Gylfi spilaði fyrstu 80 mínúturnar í 2-0 tapleik gegn Bayer Leverkusen á föstudagskvöldið en það var hans fyrsti leikur síðan í lok október. Hann fékk semsagt ekkert að spila allan nóvembermánuð.

Holger Stanislawski sagði í viðtali við Rhein-Neckar Zeitung um helgina að stærsti kostur Gylfa væri að hann gæfist aldrei upp.

„Gylfi heldur alltaf áfram. Hann er sú týpa," sagði Stanislawski. „En það sem honum vantar er að skora mark. Hann þarf á því að halda fyrir sjálfan sig."

„En hann er mjög einbeittur, kvartar hvorki né kveinar. Hann gefur allt sem hann á. Hann er afar viljugur, bæði á æfingum og í leikjum."

Stanislawski hefur aldrei notað Gylfa sem varamann í leikjum Hoffenheim. „Við ákváðum einfaldlega að fara aðra leiðir og nota aðra kosti. En mér líkar mjög vel við hvernig hann hefur tekist á við þetta. Viðhorf hans er mjög gott og það finnst okkur afar jákvætt."

Gylfi fékk að spila á föstudaginn þar sem að tveimur leikmönnum var vikið úr leikmannahópnum í síðustu viku fyrir að mæta of seint á æfingu. Hvort að Gylfi heldur sæti sínu í byrjunarliðinu fyrir næsta leik liðsins er óvíst en Stanislawski vildi ekkert segja um það.