Spákaupmenn gætu ýtt olíuverðinu í 110 dollara

Á skömmum tíma gæti heimsmarkaðsverð á olíu hækkað um 20 dollara og farið í 110 dollara á tunnuna vegna spákaupmennsku. Þetta kemur fram á vefsíðu bandarísku sjónvarpsstöðvarinnar CNBC.

„Eftirspurnin á eftir að aukast lítilega en verðhækkanirnar núna eru sem regla af tæknilegum ástæðum, það er á grundvelli greininga og spákaupmennsku," segir Imad al-Atiqi meðlimur olíuráðs Kuwait í samtali við Reuters. Verðhækkun af þessari stærðargráðu gæti vel leitt til þess að OPEC ríkin myndu auka framleiðslu sína að nýju.

Imad al-Atiqi telur hinsvegar ekki að olíuverð upp á um 100 dollara á tunnuna sé skaðlegt fyrir efnahag heimsins né hindrun í veg fyrir þeim efnahagsbata sem margar þjóðir upplifa núna.

Olíumarkaðurinn er mjög viðkvæmur fyrir ýmsu þessa daganna. Þannig hefur verðið á bandarísku léttolíunni hækkað í yfir 89 dollara á tunnuna í dag. Ástæðan er að leki er kominn á olíuleiðslu frá Alaska og taka mun nokkra daga að lagfæra hann.

Hannes Loacker olíusérfræðingur hjá Raiffeisen Bank segir í samtali við Reuters það sé sé eðlilegt að markaðurinn bregðist við með þessum hætti þar sem olíuleiðslan sé af stærri gerðinni. Spurningin um hvort hækkunin standi í einhvern tíma fari hinsvegar eftir því hve lengi taki að gera við leiðsluna.