Ný áætlun: Skuldir Grikkja skornar niður um þriðjung

Ný áætlun til að losa Grikkja undan óbærilegri skuldabyrði sinni er nú á borðinu. Alþjóðagjaldeyrissjóðurinn og Evrópusambandið hafa unnið saman að þessari áætlun en greint er frá málinu í grísku dagblaði sem og Financial Times.

Í höfuðdráttum gengur áætlunin út á að skera niður 330 milljarða evra skuldir Grikkja um þriðjung. Þetta verði gert meðal annars með því að Grikkland fær lán frá björgunarsjóði Evrópusambandsins og notar þau lán til að kaupa útistandandi ríkisskuldabréf sín á 75% af nafnvirði. Tapið taka seðlabanki Evrópu og fjárfestar á sig.

Þá verði lánstími á öðrum skuldum lengdur verulega. Þannig lengist lánstíminn á 110 milljarða evra neyðarláni Grikkja frá ESB úr þremur árum í 30 ár. Og eigendur grískra ríkisskuldabréfa verða beðnir um að lengja lánstíma þeirra í 15 til 20 ár.

Fram kemur að þessi áætlun njóti stuðnings bæði Angelu Merkel kanslara Þýskalands og Wolfgang Schäuble fjármálaráðherra hennar.

Í Financial Times segir ennfremur að þessi lausn gæti líka náð yfir skuldir Írlands.