Lánþegi Fons bendlaður við glæpi

Eignarhaldsfélag í Panama, sem Fons Pálma Haraldssonar lánaði þrjá milljarða árið 2007, er í kanadíska dagblaðinu Gazelle bendlað við peningaþvætti fyrir fyrrverandi forseta Níkaragva.

Félagið heitir Pace Associates. Skiptastjóri þrotabús Fons hefur í tvö ár reynt að grafast fyrir um það hvað varð um milljarðana þrjá sem lánaðir voru 2007. Lánasamningurinn var ekki útbúinn fyrr en viku eftir að féð var millifært og afskrifað samdægurs. Skiptastjórinn íhugar nú að stefna stjórn Fons til greiðslu skaðabóta vegna lánveitingarinnar.

Litlar sem engar upplýsingar hefur verið að hafa um félagið Pace Associates en það dúkkaði upp í umfjöllun Gazelle í maí, þar sem er fullyrt að forráðamenn félagsins, Francis Perez og Leticia Montoya, hafi notað það til að þvætta peninga fyrir Arnoldo Aleman, sem var forseti Níkaragva frá 1997 til 2002. Hann var árið 2003 dæmdur í tuttugu ára fangelsi fyrir margvísleg fjársvik, en hæstiréttur landsins ógilti síðar dóminn.

Þeir Perez og Montoya eru sagðir vera í forsvari fyrir um tvö þúsund fyrirtæki í Panama.

Fram kom í skriflegu svari Pálma til fréttastofu RÚV í gær að lánið hafi ekki verið afskrifað heldur fært niður af varúðarástæðu. „Eins og þetta var kynnt fyrir mér var um að ræða áhættufjárfestingasjóð, sem meðal annars fjárfesti í fasteignaverkefnum víða um heim, þar með talið á Indlandi. Um var að ræða ákvörðun sem ég tók og fól það í sér að félagið væri lánveitandi, en ekki hluthafi í viðkomandi verkefnum. Með því taldi ég stöðu þess betri. Í raun ekki ósambærilegt við ótryggðar lánveitingar, t.a.m. lífeyrissjóða hér á landi fyrir hrun.“

Þá segir í svari Pálma að endurskoðandi Fons hafi fengið það svar frá Landsbankanum í Lúxemborg að vafi væri á því að krafan myndi innheimtast. Á þeim grundvelli hafi verið ákveðið að afskrifa lánið í bókum Fons en ekki gagnvart lántaka. - sh