Ofbeldismenn í gæsluvarðhald

Tveir dæmdir ofbeldismenn með langa sakaferla sitja nú í einangrun í gæsluvarðhaldi á Litla-Hrauni. Þeir eru grunaðir um að hafa svipt annan mann frelsi og reynt að kúga út úr honum fé. Greint var frá þessu í fréttum Stöðvar 2 í gærkvöld.

Mennirnir tveir eru taldir hafa skipulagt glæpinn í sameiningu, en annar þeirra fór með fórnarlambið í Íslandsbanka við Stórhöfða í síðustu viku og reyndi að kúga út úr honum fé með hótunum. Starfsfólk lét þó lögreglu vita og voru mennirnir handteknir.

Mennirnir losnuðu nýlega úr fangelsi eftir að hafa afplánað dóma fyrir ofbeldisglæpi. Þeir hafa verið úrskurðaðir í gæsluvarðhald til 16. september.- sv