Sherlock og barnapían

Tvær nýjar kvikmyndir verða frumsýndar um helgina, annars vegar önnur myndin um Sherlock Holmes með Robert Downey Jr. í hlutverki spæjarans og hins vegar gamanmynd með Jonah Hill í aðalhlutverki.

En fyrst Holmes. Þetta er önnur kvikmyndin sem Guy Ritchie leikstýrir um þessa frægustu persónu Arthurs Conan Doyle. Fyrri myndin sló rækilega í gegn og því nokkuð sjálfgefið að Robert Downey Jr. og Jude Law, sem leikur Watson lækni, myndu endurtaka leikinn. Noomi Rapace er ágætis viðbót í leikarahópinn og þá leikur Jared Harris erkióvininn snjalla, Moriarty. Myndin segir frá því þegar austurríski krónprinsinn finnst látinn og Holmes tekur að rannsaka það sem morð þrátt fyrir að flestir séu þess fullvissir að hann hafi framið sjálfsmorð. Rannsóknin leiðir hann á slóð bróður síns og spákonunnar Sim og honum verður í kjölfarið endanlega ljóst að ekki er allt sem sýnist. Myndin hefur fengið misjafnar viðtökur og þykir ekki hafa náð þeim hæðum sem búist var við. Samkvæmt rottentomatoes.com eru 59 prósent gagnrýnenda sátt við hana.

Gamanmyndin The Sitter byggir á kunnuglegu stefi en hún fjallar um iðjuleysingjann Noah Griffith sem Jonah Hill leikur. Hann ákveður hins vegar að gera móður sinni smá greiða og taka að sér barnapíustarf en klúðrar því á ákaflega eftirminnilegan hátt. Myndin hefur fengið fremur dræmar viðtökur en aðeins 25 prósent gagnrýnenda voru sátt við hana samkvæmt rottentomatoes.com. - fgg