Schweinsteiger bíður spenntur eftir því að koma til Indlands

Þýska stórliðið Bayern Munchen er á leið til Indlands þar sem það mun mæta indverska landsliðinu í æfingaleik þann 12. janúar næstkomandi. Þýski landsliðsmaðurinn Bastian Schweinsteiger er afar spenntur fyrir ferðinni og þegar byrjaður að pakka.

"Ég get ekki beðið eftir að kynnast ástríðunni sem Indverjar hafa fyrir fótbolta. Ég veit að Indland var stórveldi fyrir rúmum 50 árum og ég vil vita hvað gerðist eftir það," sagði þýski miðjumaðurinn.

"Ef fleiri stórlið koma til Indlands á næstu árum þá mun það auka knattspyrnuáhugann í landinu," sagði Schweini en Indverjar eru mun hrifnari af krikket.