Víða pottur brotinn í samningum menntamálaráðuneytisins

Ríkisendurskoðun hefur gert ýmsar athugasemdir við saminga á vegum menntamálaráðuneytisins.

Í nýrri skýrslu Ríkisendurskoðunar er fjallað um rúmlega 70 samninga sem menntamálaráðuneytið hefur gert við aðila utan ríkisins, það er samtök, einkaaðila og sveitarfélög. Áætlað er að kostnaður við þessa samninga hafi numið um 10,6 milljörðum króna á síðasta ári. Þar af var rúmlega helmingur vegna samninga við Ríkisútvarpið, Háskólann í Reykjavík og Tækniskólann.

Í skýrslunni kemur fram að eftirlit ráðuneytisins með framkvæmd samninganna sé ekki að öllu leyti í samræmi við ákvæði þeirra, T.d. hafi formlegar úttektir ekki verið gerðar. Þá hafi heimildir til endurskoðunar samninga sjaldan verið nýttar og frestur til endurnýjunar ekki virtur í öllum tilvikum.

Bent er á að ekki séu gildir samningar um öll verkefni sem mennta- og menningarmálaráðuneytið greiðir fyrir. Á árinu 2011 var þannig áætlað að greiða samtals 4,6 milljarða króna samkvæmt 35 útrunnum samningum og tveimur ógildum.

Ríkisendurskoðun hvetur ráðuneytið til að bæta úr þessum annmörkum og að samræma eftirlit sitt með skuldbindandi samningum.