Staðfestu 80 milljóna sekt vegna verðsamráðs

Langisjór, móðurfélag Síldar og fisks og Matfugls, þarf að greiða 80 milljóna króna sekt vegna ólögleg samráðs við Bónus um vöruverð. Samkeppniseftirlitið komst að þeirri niðurstöðu að Síld og fiskur og Matfugl, auk Sláturfélags Suðurlands, Reykjagarðs, Kjötafurðastöðvar Kaupfélags Skagfirðinga, Norðlenska, Kjarnafæðis og Kjötbankans höfðu brotið af sér með tvíhliða samningum eða samstilltum aðgerðum í tengslum við smásöluverðlagningu á kjöti og unnum kjötvörum sem kjötvinnslurnar höfðu verðmerkt fyrir Bónus.

Þessi fyrirtæki óskuðu flest eftir því að ljúka málinu með sátt við Samkeppniseftirlitið. Síld og fiskur og Matfugl óskuðu aftur á móti eftir sáttaviðræðum við Samkeppniseftirlitið en þær viðræður skiluðu ekki niðurstöðu. Þurfti Samkeppniseftirlitið því að taka afstöðu til aðgerða fyrirtækjanna í sérstakri ákvörðun og lagði 80 milljóna króna sekt á þau.

Fyrirtækin kærðu ákvörðunina til áfrýjunarnefndar Samkeppnismála til að fá réttaráhrifunum frestað, en áfrýjunarnefndin staðfesti ákvörðunina.