Gunnar undirbýr svar með Skúla Bjarnasyni lögmanni

Gunnar Andersen, forstjóri Fjármálaeftirlitsins (FME), hefur andmælarétt til lok dags á mánudaginn, vegna þeirrar ákvörðunar stjórnar FME um að segja honum upp störfum. Samkvæmt heimildum fréttastofu tilkynnti Aðalsteinn Leifsson, formaður stjórnar FME, Gunnari fyrir hönd stjórnarinnar um þá ákvörðun að segja honum upp störfum, og bauð honum að gera það í sátt við hann. Það var Gunnar ekki tilbúinn til þess að gera, og í kjölfar formlegrar beiðni lögmanns Gunnars, Skúla Bjarnasonar hrl., um frekari rökstuðning fyrir ákvörðuninni, varð úr að Gunnar fengi frest til lok dags á mánudag, til þess að andmæla ákvörðuninni með lagalegum rökum.

Fréttastofa náði tali af Gunnari fyrir skömmu, en hann var ekki tilbúinn að ræða um uppsögnina, eða annað er þessu máli tengist, að svo stöddu.

Eins og greint var frá á Vísi fyrr í kvöld var ákvörðun stjórnar FME tekin eftir að Ástráður Haraldsson hrl. og Ásbjörn Björnsson endurskoðandi höfðu skilað skýrslu til stjórnar FME um aðkomu Gunnars að aflandsfélögum, þegar hann starfaði hjá Landsbankanum, og hæfi hans til þess að gegna starfi forstjóra.

Andri Árnason hrl. hafði í tvígang verið fenginn til þess að meta hæfi Gunnars, eftir að upplýsingar komu fram, m.a. í Kastljósi RÚV, þess efnis að hann hefði komið að starfsemi aflandsfélaga Landsbankans á þeim tíma er hann starfaði þar, sem var á árunum 1991 til 2003. Ástráður og Ásbjörn voru síðan fengnir til þess að fara yfir síðara mat Andra, og draga fram nýjar upplýsingar eftir því sem þörf var á.

Gunnar var ráðinn forstjóri FME 3. apríl 2009 og var þá valinn úr hópi 19 umsækjenda.

Frekari upplýsingar um málið koma hér inn á Vísi eftir því sem upplýsingar um málið berast.