Hagnaður Icelandair 4,5 milljarðar í fyrra

Hagnaður Icelandair á síðasta ári nam 4,5 milljörðum króna sem var í samræmi við væntingar félagsins.

Afkoman var mismunandi eftir ársfjórðungum og þannig var 1,1 milljarðs króna tap á fjórða ársfjórungi sem einkum má rekja til hækkandi eldsneytisverðs.

Í tilkynningu um uppgjörið kemur fram á fjárhagsleg staða Icelandair sé sterk, handbært fé nemur 12,5 milljörðum króna og eiginfjárhlutfall er 36%. Þá kemur fram í tilkynningunni að Icelandair muni bæta tveimur nýjum flugvélum við flota sinn á þessu ári.

"Við gerum ráð fyrir að auka umsvif okkar enn á árinu 2012. Icelandair verður með umsvifamestu flugáætlun sína frá upphafi og bókanir fyrir fyrstu mánuði ársins lofa góðu," segir Björgólfur Jóhannsson forstjóri félagsins í tilkynningunni.