Huldufélag keypti án auglýsingar eignir REI af Orkuveitunni

Fyrirtækið Orka Energy Holding keypti eignir Reykjavik Energy Invest (REI) af Orkuveitu Reykjavíkur sl. haust án auglýsingar en hvorki Orkuveitan né Geysir Green Energy geta upplýst um eigendur Orku Energy Holding, sem eru að hluta Íslendingar. Óvíst er hvað Orkuveita Reykjavíkur hefur tapað miklu á REI-útrásarævintýrinu.

Meðal eigna sem Orkuveita Reykjavíkur seldi á síðasta ári voru eignarhlutir í fyrirtækjum sem áður tilheyrðu Reykjavík Energy Invest (REI), útrásararmi Orkuveitunnar.

Hér er um að ræða eignarhlut í Iceland America Energy, sem er í slitameðferð, 19,53 prósenta hlut í Enex Kína ehf. og tæplega fjórðungshlut í Envent Holding ehf. sem á jarðhitafyrirtæki á Filippseyjum. Gengið var frá sölu þessara eigna sl. haust og var hún ekki sérstaklega auglýst.

Orkuveitan fékk 350-380 milljónir króna fyrir eignarhluti sína í Envent Holding og Enex Kína, samkvæmt upplýsingum sem koma fram í aðgerðaáætlun Orkuveitunnar og eigenda.

Geysir Green Energy átti rúmlega 80,47 prósenta hlut í Enex Kína á móti tæplega 19,53 prósenta hlut REI.

Samkvæmt upplýsingum frá Orkuveitunni var það fyrirtækið Orka Energy Holding, sem keypti bæði félögin, Enex Kína og Envent Holding ehf. Engar upplýsingar fundust um hluthafa fyrirtækisins í fyrirtækjaskrá, sem eru samkvæmt upplýsingum fréttastofunnar íslenskir og erlendir fjárfestar.

Hvorki Orkuveitan né Alexander K. Guðmundsson, forstjóri Geysis Green Energy, gátu upplýst um eignarhaldið á Orku Energy Holding. Fréttastofan náði jafnframt tali af Gunnari Thoroddsen, framkvæmdastjóra Orku Energy, en hann gat að svo stöddu ekki upplýst um hluthafa fyrirtækisins.

Sérstaka athygli vekur að Orka Energy Holding er skráð til heimilis á Bæjarhálsi 1, á sama stað og Orkuveitan, en skýringin mun vera sú að fyrirtækið leigir skrifstofuaðstöðu af Orkuveitunni.

Árið 2005 birtust í íslenskum fjölmiðlum fréttir af stórhuga áformum Enex í Kína, en fyrirtækið skrifaði þá undir samning um byggingu stærstu jarðhitaveitu heims í borginni Xianyang, en fyrsti áfangi jarðhitaveitunnar var metinn á 1,3 milljarða króna. Uppbygging á jarðhitaveitunni stendur enn yfir og þá hefur Enex haft áform um uppbyggingu á fleiri stöðum í Kína.

Ekki liggur fyrir hvað Orkuveita Reykjavíkur hefur tapað miklu á fjárfestingum í erlendum jarðhitafyrirtækjum sem tilheyrðu REI. Fréttastofan spurði Bjarna Bjarnason, forstjóra Orkuveitunnar, um þessi mál í gær. Hann sagði að hugsanlega hefði Orkuveitan getað fengið hærra verð fyrir eignarhluti sína þessum fyrirtækjum sem voru undir REI ef beðið hefði verið með söluna. „Ég get ekki svarað því nákvæmlega. Við urðum að selja og við seljum allt sem við getum selt sem ekki styður við okkar kjarnarekstur og þar á meðal eru þessi fyrirtæki. Það getur verið að þau hefðu orðið verðmætari með tímanum, en ég get ekki svarað því," sagði Bjarni. thorbjorn@stod2.is