Þjónustujöfnuðurinn hagstæður um 36 milljarða í fyrra

Samkvæmt bráðabirgðatölum var útflutningur á þjónustu 332,6 milljarðar kr. á árinu 2011 en innflutningur á þjónustu 296,6 milljarðar kr. Þjónustujöfnuður við útlönd á árinu 2011 var því jákvæður um 36,0 milljarða.

Útflutningur á þjónustu á fjórða ársfjórðungi í fyrra var, samkvæmt bráðabirgðatölum, 74,5 milljarðar kr. en innflutningur á þjónustu 79,5 milljarðar kr. Þjónustujöfnuður við útlönd á fjórða ársfjórðungi var því neikvæður um 4,9 milljarða kr.

Þetta kemur fram á vefsíðu Hagstofunnar. Þar segir að samgöngur eru stærsti þjónustuliður í útflutningi á fjórða ársfjórðungi síðasta árs og afgangur vegna þeirrar þjónustu var um 15,8 milljarðar kr. Önnur þjónusta er stærsti liður í innflutningi og nam halli á þeirri þjónustu um 10,3 milljörðum kr. Halli á ferðaþjónustu var um 10,4 milljarðar kr.

Samgöngur skiluðu 66,6 milljarða kr. afgangi á árinu 2011 í heild samkvæmt bráðabirgðatölum. Á móti kom að halli var á annarri þjónustu um 27,4 milljarðar kr.og halli á ferðaþjónustu um 3,2 milljarðar kr. á árinu 2011.