Eignir Carlos Slim á við sex árlegar landsframleiðslur Íslands

Ríkasti maður veraldar, samkvæmt uppfærðum lista Forbes, er Mexíkóinn Carlos Slim. Eignir hans eru metnar á 74 milljarðar dollara, eða sem nemur ríflega níu þúsund milljörðum króna. Það jafnast á við sex árlegar landsframleiðslur Íslands.

Slim er í dag langsamlega ríkasti maður heims en næsti maður á eftir honum, Bill Gates stjórnarformaður Microsoft, er talinn eiga eignir upp á 56 milljarða dollara.

Slim stækkaði eignasafn sitt um 20,5 milljarða dollara í fyrra sem kom mörgum á óvart. Þar vega þungt fasteignaverkefni hans í Mexíkó og námuiðnaður víða í Suður-Ameríku. En eignasafn hans í skráðum félögum í Mexíkó ávaxtaðist um 19 prósent í fyrra. Kjarnastarfsemi hans byggir á fjarskiptafyrirtækjum í Suður-Ameríku, en Slim og fjölskylda hans á 62 prósent hlut í America Movil, sem er stærsta fjarskiptafyrirtækið í Mexíkó.

Slim er meðal stærstu eiganda bandaríska stórblaðsins The New York Times auk þess að vera stærsti einstaki hluthafi Saks smásölukeðjunnar. Að öðru leyti hefur hann ekki mikið fjárfest í bandarísku efnahagslífi.

Slim opnaði nýlega stærsta listaverkasafn Mexíkó, Soumaya safnið. Á því er finna marga verðmæta dýrgripi en Slim ákvað að hafa frítt inn allt árið um kring fyrir almenning í Mexíkó.