Englendingurinn Justin Rose vann WGC-Cadillac mótið í golfi í Flórída í gær en mótið er hluti af PGA mótaröðinni vestanhafs. Rose lék hringina fjóra samanlagt á sextán höggum undir pari.
Rose var þremur höggum á eftir Bandaríkjamanninum Bubba Watson fyrir lokahringinn í gær. Eftir fugl á fyrstu holu dagsins fataðist Watson flugið og fékk meðal annars þrjá skolla í röð á fyrri níu.
Spennan var mikil á lokaholunum en Rose spilaði í holli á undan Watson. Svo fór að Watson tókst ekki að setja niður þriggja metra pútt á 18. holu til að jafna Rose sem fagnaði sigri.
„Ég hef lagt hart að mér að undanförnu. Sigrar sem þessi gera þetta allt þess virði," sagði Rose. Hann sagði alltaf þægilegt að vera einu holli á undan forystusauðunum á lokahringnum.
Rose, sem er sem stendur í 22. sæti heimslistans, hefur nú unnið fjögur PGA-mót á ferli sínum og jafnað þar með landa sína Tony Jacklin og Luke Donald. Nick Faldo er eini Englendingurinn sem er sigursællien hann vann níu PGA-mót á ferli sínum.
Efsti maður heimslistans, hinn 22 ára gamli Rory McIlroy, spilaði frábært golf á lokahringnum en það dugði ekki til. Norður-Írinn lék lokahringinn á fimm höggum undir pari og fjórtán undir samanlagt.
McIlroy ætlar að taka sér þriggja vikna hlé frá keppni í undirbúningi sínum fyrir Masters-mótið. Keppt verður á Augusta-vellinum í Georgíu fyrstu helgina í apríl.
Tiger Woods heltist úr lestinni á 11. holu þegar hann pakkaði saman vegna meiðsla á hásin.
Justin Rose landaði fjórða PGA titlinum | Tiger hætti vegna meiðsla
