Kaka kom inná og kláraði leikinn | Real Madrid í frábærum málum

Brasilíumaðurinn Kaka var maðurinn á bak við 3-0 útisigur Real Madrid á kýpverska liðinu APOEL Nicosia í fyrri leik liðanna í átta liða úrslitum Meistaradeildarinnar í kvöld. Real Madrid er komið með annan fótinn í undanúrslitin og ævintýri kraftaverkaliðsins frá Kýpur er svo gott sem á enda.

Kaka kom inn á sem varamaður á 63. mínútu þegar ekkert hafði gengið hjá Real að skora þrátt fyrir mikla yfirburði. Kaka lagði upp fyrsta markið fyrir Karim Benzema og skoraði annað markið síðan sjálfur. Karim Benzema bætti síðan við þriðja markinu í blálokin.

Karim Benzema kom Real Madrid í 1-0 á 74. mínútu með skalla eftir undirbúning frá varamanninum Kaka.

Kaka skoraði annað markið á 82. mínútu eftir sendingu frá Marcelo og undirbúning frá Cristiano Ronaldo.

Karim Benzema innsiglaði síðan sigurinn með því að skora annað mark sitt og þriðja mark Real Madrid á 90. mínútu eftir sendingu frá Mesut Özil.