Talsmaður Nubo: Ekkert breyst hér á landi

„Við höfum ekki upplýsingar um að eitthvað hafi breyst," segir Halldór Jónsson, landslagsarkitekt og talsmaður kínverska fjárfestarins Huang Nubo hér á landi.

Kínverska ríkisútvarpið greindi frá því í dag að Nubo hefði náð samkomulagi um risafjárfestingu í suðvesturhluta Kína þar sem stendur til að reisa heilsuþorp líkt því og Nubo vildi reisa á Grímsstöðum á Fjöllum. Um er að ræða risafjárfestingu samkvæmt heimasíðunni, því þar er sagt að Nubo ætli að fjárfesta fyrir 8 milljarða dollara í þorpinu Pu´er í Yunni héraði í Kína. Hann leitar einnig fleiri fjárfesta til þess að koma að verkefninu.

Í byrjun febrúar var greint frá því á fréttastofu Stöðvar 2 að Sveitarfélagið Norðurþing íhugaði að kaupa jörðina Grímsstaði á Fjöllum með láni frá Huang Nubo og leigja honum hana síðan.

Aðspurður segir Halldór þessa umræddu fjárfestingu ekki hafa áhrif á þær áætlanir eftir því sem hann best viti. Eins og fram hefur komið liggur fyrir umsókn um fjárfestingasamning frá sveitarfélaginu inni á borði iðnaðarráðuneytis. Umsókn Huang Nubo er dagsett 18. janúar og er um langtímaleigu á hluta Grímsstaða og að íslenskt fyrirtæki í hans eigu fái að reisa og reka þar 100 herbergja lúxushótel. Ennfremur að fá á Reykjavíkursvæði að reisa og reka 300 herbergja 5 stjörnu hótel.

„Það er nokkuð ljóst að fyrirtækið hans hefur fengið gríðarlega góða kynningu hér og landi auk þess sem það er öflugt og gott. Svo er þessi markaður á mikilli siglingu," segir Halldór vongóður um að Nubo fái að fjárfesta hér á landi.

Og þó Ögmundur Jónasson hafi ekki leyft Nubo að fjárfesta á Grímsstöðum á Fjöllum þá er ljóst að aðrir eru afar jákvæðir í garð Kínverjans. Þannig var honum boðið til Danmörku að skoða fjárfestingatækifæri. Þegar Halldór er spurður hvernig sú ferð hafi farið svarar hann því til að Nubo vilji fyrst fá svör um fjárfestingar hér á landi. Halldór segist ekki vita hvenær von sé á svari, en vonast til þess að það komi á næstu vikum.