Busquets: Ekki óþægilegt að vera sigurstranglegra liðið

Hinn óvinsæli miðjumaður Barcelona, Sergio Busquets, er bjartsýnn á að sitt lið ýti Chelsea úr vegi í Meistaradeildinni og komist alla leið í úrslit enn eitt árið.

Andres Iniesta skoraði sigurmarkið í umdeildum leik liðanna fyrir þremur árum síðan. Markið kom í uppbótartíma.

"Ég vona að þetta verði ekki eins dramatískt og þá. Við vitum vel að þetta verður erfitt og við verðum að vera á tánum frá fyrstu mínútu. Chelsea hefur verið óstöðugt í vetur og við verðum að gæta okkar," sagði Busquets.

"Við erum samt bjartsýnir og okkur dreymir um úrslitaleikinn. Okkur finnst ekkert óþægilegt að vera sigurstranglegri aðilinn. Við erum alltaf undir pressu og leikmennirnir eru vanir því."