Dortmund bikarmeistari með glæsibrag

Borussia Dortmund er tvöfaldur meistari í Þýskalandi. Í dag pakkaði Dortmund liði Bayern München saman í úrslitum bikarkeppninnar, 5-2.

Dortmund er það með búið að vinna Bayern fimm sinnum í röð og er aðeins annað liðið í sögu Bayern sem nær að leggja stórveldið svo oft í röð. Frankfurt gerði það síðast fyrir 35 árum.

Dortmund fékk draumabyrjun í leiknum er Shinji Kagawa kom boltanum yfir línuna á 3. mínútu eftir skyndisókn. Það gerði hann fyrir framan Sir Alex Ferguson, stjóra Man. Utd, sem var mættur á völlinn að því talið er til þess að ganga frá kaupum á Kagawa.

Bayern jafnaði leikinn á 25. mínútu er Arjen Robben skoraði úr réttmætri vítaspyrnu.

Fjórum mínútum fyrir hálfleik fékk Dortmund einnig víti eftir að Gustavo braut klaufalega af sér. Mats Hummels skoraði úr spyrnunni en Manuel Neuer var ekki fjarri því að verja.

Dortmund skoraði svo þriðja markið rétt fyrir hlé. Það gerði Robert Lewandowski og kom Dortmund í afar huggulega stöðu.

Lewandowski skoraði svo fjórða markið á 58. mínútu og kláraði leikinn fyrir þýsku meistarana.

Franck Ribery klóraði í bakkann fyrir Bayern með marki korteri fyrir leikslok en nær komst Bayern ekki. Lewandowski sá til þess er hann fullkomnaði þrennuna sína.