Óbreytt verðbólga í júní frá fyrri mánuði

Ársverðbólgan mældist 5,4% í júní og er því óbreytt frá fyrri mánuði. Þetta er algerlega úr takti við spár sérfræðinga sem flestir spáðu því að verðbólgan færi undir 5%.

Á vefsíðu Hagstofunnar segir að vísitala neysluverðs miðuð við verðlag í júní er 400,1 stig og hækkaði um 0,50% frá fyrra mánuði. Vísitala neysluverðs án húsnæðis er 380,7 stig og hækkaði um 0,61% frá maí.

Verð á bensíni og díselolíu lækkaði um 3,2% (vísitöluáhrif -0,19%) en flugfargjöld til útlanda hækkuðu um 11% (0,19%) og verð á mat- og drykkjarvörum hækkaði um 1,1% (0,15%).

Síðastliðna tólf mánuði hefur vísitala neysluverðs hækkað um 5,4% og vísitalan án húsnæðis um 5,5%. Undanfarna þrjá mánuði hafa bæði vísitala neysluverðs og vísitala neysluverðs án húsnæðis hækkað um 1,3% sem jafngildir 5,2% verðbólgu á ári.