FME: Neikvæð staða lífeyrissjóða nemur 700 milljörðum

Neikvæð staða lífeyrissjóðakerfisins miðað við skuldbindingar í framtíðinni nemur nærri 700 milljörðum króna. Sérfræðingur Fjármálaeftirlitsins segir að úrbóta sé þörf, en að miklu leyti snúi þær að stjórnmálamönnum.

Fjármálaeftirlitið kynnti í dag mat sitt á stöðu lífeyrissjóðakerfisins en þar kemur fram að þrátt fyrir 2000 milljarða eignir þá er staða mála miðað við framtíðarskuldingar mikið áhyggjuefni

Raunávöxtun lífeyrissjóðanna, þar sem lögbundið ávöxtunarmarkmið er 3,5 prósent, hefur lagast nokkuð eftir hið mikla tap sjóðanna á árinu 2008, þegar fjármálakerfið hrundi, en á bóluárunum fyrir hrun sýndu sjóðirnir góða raunávöxtun.

En þó raunávöxtun hafi verið að lagast, þá er tryggingfræðilega staða, það er eignastaða miðað við framtíðarskuldbindingar, áhyggjuefni að mati Fjármálaeftirlitsins. Heildarneikvæð staða er 668 milljarðar króna, og þar af er neikvæð staða lífeyrissjóða með opinbera ábyrgð ríkis og sveitarfélaga 474 milljarðar króna.

„Hún hefur versnað aðeins hjá þessum sjóðum sem eru á ábyrgð ríkis og sveitarfélaga en hefur batnað hjá þeim sjóðum sem eru án ábyrgðar. Það er fyrst og fremst vegna skerðingar sem á sér stað. Það er áætlað að skerðingar síðustu ára hafi numið 130 milljörðum hjá þeim sjóðum sem ekki eru með ábyrgð," segir Björn Z. Ásgrímsson, sérfræðingur FME.

Undirliggjandi í mati á styrk lífeyrissjóðakerfa er aldursamsetning þjóða. Eins og hér sést hefur mikil breyting átt sér staða á aldursamsetningu þjóðarinnar frá árinu 1980, samhliða fjölgun um tæplega 100 þúsund. Lífeyrissjóðakerfi þurfa óhjákvæmilega að laga sig að meiri lífaldri þjóðarinnar.

„Gríðarlega mikill halli um 668 milljarðar í öllu kerfinu en það rétt að taka fram að þetta er halli sem ekki kemur til greiðslu á næstu fimmtán til tuttugu árum,"" segir Björn.