N1 býður starfsmönnum Hyrnunnar aftur vinnu

Olíufyrirtækið N1 ætlar að reka veitingastað og vegasjoppu í Hyrnunni þar sem Samkaup voru áður. Starfsmönnum Hyrnunnar sem sagt var upp störfum í síðustu viku verður boðin vinna á veitingastað N1, að sögn Hermanns Guðmundssonar, forstjóra N1.

„Það er stefna N1 að reka alla sína stóru þjóðvegarskála sjálfir," segir Hermann og því hafi N1 gripið tækifærið þegar leigusamningur Samkaupa á Hyrnunni rann út.

N1 áformar að opna nýjan og mikið breyttan stað í Hyrnunni næsta vor. Húsið fær að standa en verður allt innréttað upp á nýtt. Að því leyti verður þessi yfirtaka ólík því þegar N1 tók yfir rekstur Staðarskála, en þá var gamli skálinn rifinn og nýr byggður frá grunni.

Staðurinn verður stærri og umfangsmeiri í rekstri N1. Starfsemin verður í anda bensínstöðva N1 í Ártúnsbrekku og Hringbraut. Því verður gert ráð fyrir fleira starfsfólki en nú starfar í Hyrnunni. Hermann er fullviss um að skilyrði séu fyrir að reka svo stóran veitingastað á þessum slóðum, enda sé mikill straumur ferðamanna á svæðinu á sumrin.