Evrukreppa gæti seinkað afnámi gjaldeyrishafta

Áhrif sem kreppa í Evrópu myndi hafa á Ísland eru óljós. Hún gæti haft neikvæð áhrif á innlendan hagvöxt og frestað eitthvað afnámi gjaldeyrishafta. Litlar líkur eru aftur á móti á alvarlegum fjármálalegum óstöðugleika. Því valda vel fjármagnaðir viðskiptabankar, gjaldeyrishöft, mikiill gjaldeyrisforði og lenging lána ríkissjóðs.

Þetta kemur fram í svari Steingríms J. Sigfússonar, efnahags- og viðskiptaráðherra, við fyrirspurn Illuga Gunnarssonar um undirbúning stjórnvalda vegna mögulegrar útgöngu Grikklands úr evrusamstarfinu. Svarið var birt á vef Alþingis fyrir helgi.

Steingrímur segir að ef samdráttur á evrusvæðinu verður verulegur og langvarandi megi búast við meiri áhrifum en í kjölfar fjármálakreppunnar árið 2008. Hann telur þó ólíklegt að hún leiði til alvarlegs óstöðugleika á Íslandi.

Einnig kemur fram að sérstakir vinnuhópar hafi ekki verið stofnaðir til að bregðast við mögulegri kreppu. Allt hefðbundið viðbúnaðarkerfi hefur aftur á móti verið virkjað og stjórnvöld fylgjast grannt með gangi mála.

Hér má lesa svar Steingríms í heild sinni.