Kínverjar lána Afríkuríkjum 2.500 milljarða

Kínverjar ætla að lána 50 Afríkuríkjum 20 milljarða dollara, eða um 2.500 milljarða króna, á næstu þremur árum.

Lánið á að nota til ýmiskonar uppbyggingar í samgöngum og landbúnaði og til að liðka fyrir stofnun smærri fyrirtækja. Tilkynnt var um lánið á fundi í Bejing sem Hu Jintao forseti Kína átti með leiðtogum ríkjanna 50 í gær.

Lán þetta er tvöfalt stærra en það sem Kínverjar veittu þessum þjóðum árið 2009. Frá þeim tíma hefur Kína orðið stærsti einstaki viðskiptafélagi Afríku en viðskiptin milli Kína og Afríku námu 166 milljörðum dollara í fyrra.

Kínverjar vinna að því leynt og ljóst að styrkja stöðu sína í Afríku enda býr álfan yfir miklu af ónýttum náttúruauðæfum. Hvernig Kínverjar fara að þessu hefur verið gagnrýnt víða. Gagnrýnin gengur aðallega út á að umhverfisvernd situr á hakanum í áformum Kínverjanna og að þeir nota mikið eigin verkamenn í stað þess að ráða innfædda í flestum framkvæmdum sínum.