Felldu tillögu um útsvarslækkun

Meirihluti Besta flokks og Samfylkingar felldi á fundi borgarstjórnar í dag tillögu um að útsvar verði lækkað í Reykjavík. Sjálfstæðisflokkurinn lagði lækkunina til svo að hækkanir núverandi meirihluta yrðu dregnar til baka.

Sjálfstæðisflokkurinn telur að niðurstöður ársreiknings 2011 og hálfsársuppgjörs 2012 bendi til þess að borgin hafi borð fyrir báru og hægt sé að lækka útsvarið. Uppgjörin benda til þess að skatttekjurnar séu talsvert umfram fjárþörf að mati Sjálfstæðisflokksins.

„Rökin fyrir því að halda sköttum á almenning lágum eru augljós," sagði Hanna Birna Kristjánsdóttir, oddviti Sjálfstæðisflokksins í umræðum í borgarstjórn í dag. Hún telur Reykjavík hafa burði til að veita góða þjónustu án þess að innheimta hámarksútsvar og það sé mikilvægt að gera um þessar mundir.