Baldur Guðlaugsson í vinnu hjá Lex lögmannsstofu

Baldur Guðlaugsson, fyrrverandi ráðuneytisstjóri fjármálaráðuneytisins, sinnir nú verkefnum fyrir Lex lögmannsstofu, að því er fram kemur í frétt á vef Viðskiptablaðsins. Starf Baldurs er hluti af afplánun hans, sem hann situr nú af sér á áfangaheimilinu Vernd, eftir að hafa verið dæmdur í tveggja ára fangelsi, fyrr á þessu ári, vegna innherjasvika og brots í opinberu starfi.

Brotin framdi Baldur þegar hann seldi hlutabréf í Landsbankanum fyrir ríflega 190 milljónir króna, í september 2008, er hann var ráðuneytisstjóri í fjármálaráðuneytinu og átti sæti í samráðshópi stjórnvalda um fjármálastöðugleika.

Skilyrðið fyrir því að fangi sé á Vernd er að hann sé í starfi eða námi á daginn, og sé síðan kominn aftur á Vernd um kvöldið og sé þar yfir nóttina.

Haft er eftir Erni Gunnarssyni, faglegum framkvæmdastjóra Lex, í frétt Viðskiptablaðsins að mikill akkur sé í Baldri þar sem hann sé reynslumikill lögmaður og embættismaður sem búi yfir mikilli þekkingu.