Borgin kaupir lóðir á Mýrargötu og slippsvæði fyrir 528 milljónir

Borgarráð samþykkti á borgarráðsfundi í morgun að kaupa lóðir á Mýrargötu og slippsvæði af Faxaflóahöfnum fyrir 528 milljónir króna. Mögulegt er að byggja allt að 250 íbúðir á svæðinu á milli Sjóminjasafnsins og Slippsins en reiknað er með að framkvæmdir hefjist fyrst þar. Á sama fundi var samþykkt að vísa rammaskipulagi gömlu hafnarinnar í Reykjavík til meðferðar í skipulagsráði.

Rammaskipulagið byggir á vinningstillögu arkitektastofunnar Graeme Massie Architects sem bar sigur úr býtum í opinni hugmyndasamkeppni um Gömlu höfnina sem lauk í desember 2009. Tillagan gerir ráð fyrir þéttri blandaðri byggð við höfnina og meiri sveigjanleika en fyrirliggjandi deiluskipulag á svæðinu. Hægt er að skoða vinningstillöguna í meðfylgjandi myndum.

Markmið rammaskipulagsins er að gera borgina að hluta af höfninni og höfnina hluta af borginni. Byggt verður þétt hafnarhverfi við sjóinn, húsin standa nánast á hafnarbakkanum og göturnar teygja sig niður að hafinu. Við það opnast þægilegar leiðir niður að höfninni og sjónásar skapast út á sjóinn.

Í tilkynningu frá Reykjavíkurborg segir að gert sé ráð fyrir því að Geirsgötu verði breytt úr fráhrindandi og hættulegri hraðbraut í vistlega borgargötu með talsvert hægari umferð en þar er nú. Gatan á samt sem áður að geta annað mikilli umferð sem fer þarna í gegn.