Eymundsson eykur umsvifin á rafbókamarkaði

Eymundsson gerði nýverið samning við eitt stærsta útgáfufélag í Evrópu, um sölu á erlendum rafbókum. Í kjölfarið hafa íslenskir lestrarhestar aðgang að rúmlega 240 þúsund erlendum titlum á vef Eymundsson.

„Viðtökur hafa verið framar björtustu vonum," segir í tilkynningu frá Eymundsson. Eftir að samningurinn við útgáfufélagið Hachette Book Group gekk í gildi hefur fjöldi seldra rafbóka síðustu daga verið meiri en fjöldi hefðbundinna titla í mörgum verslunum Eymundsson á landinu.

Rafbókasala er að færast verulega í aukana samkvæmt nýjustu sölutölum. „Sem eru sannarlega góð tíðindi í bóksölunni hér á landi," segir Ninja Elín Maggadóttir, verkefnastjóri markaðsmála Eymundsson.

Öll verð á rafbókum Eymundsson eru í íslenskum krónum og innihalda íslenskan virðisaukaskatt.

Í farvatninu eru fleiri samningar við erlenda útgefendur og dreifingaraðila.