Veiðigjöldin fara í stuðning við barnafjölskyldur

Veiðigjöldin sem samþykkt voru á Alþingi í vor munu skila ríkissjóði 5,8 milljörðum króna meiri tekjum en áður hafði verið gert ráð fyrir á árinu 2013. Þessar tekjur munu standa undir fjárfestingaáætlun ríkisstjórnarinnar og verður að mestu leyti varið í vegaframkvæmdir, rannsókna- og tæknisjóði og stuðning við tekjulægri barnafjölskyldur og fjölskyldur í greiðsluvanda.

Þetta kemur fram í fjárlagafrumvarpi næsta árs sem kynnt var á Alþingi í gær. Þar kemur fram að veiðigjöldin séu þáttur í nýtilkomnum tekjuöflunaraðgerðum ríkissjóðs. Veiðigjöldin koma til viðbótar hinu almenna gjaldi sem hefur verið innheimt síðastliðin ár. Gjaldið er reiknað af rentu í fiskveiðum og fiskvinnslu. Fyrst í stað verða gjöldin 50% af rentunni en munu á næstu árum hækka upp í 65%.

Í frumvarpinu kemur fram að veiðigjöldin verði önnur stoðin af tveimur undir fjárfestingaáætlun ríkisstjórnarinnar. Hin stoðin verður fjármagnið sem ríkið fær til baka af því sem lagt var fram til að endurfjármagna bankakerfið. Enn liggur hvorki fyrir hvenær eignarhlutir ríkisins í bönkunum verða seldir né hvert verðmæti þeirra er.

Hins vegar er gert ráð fyrir því að veiðigjaldið skili ríkinu 5,8 milljörðum í auknar tekjur á árinu. 3,8 milljörðum af því verður ráðstafað í tiltekin fjárfestingarverkefni og bera vegaframkvæmdir og viðhald samgöngukerfisins þar hæst. 2 milljörðum verður svo varið í ný áherslumál ríkisstjórnarinnar sem eru einkum stuðningur við barnafjölskyldur og fjölskyldur í greiðsluvanda.