Orkuveita Reykjavíkur semur við Tölvumiðlun

„Við erum afar ánægð með samninginn því Orkuveita Reykjavíkur er eitt af stærstu opinberu fyrirtækjum landsins," segir Art Schalk, sölu- og markaðsstjóri Tölvumiðlunar, í fréttatilkynningu en fyrirtækið gerði nýlega samning við Orkuveitu Reykjavíkur.

Orkuveitan ætlar að innleiða eina af aðalvörum Tölvumiðlunar, H3 heildarlausn í mannauðsmálum, sem flest af stærstu fyrirtækjum landsins nota við launaútreikninga. Hjá Orkuveitunni starfa rúmlega 400 manns og mun H3 halda utan um öll launa- og mannauðsmál starfsmanna frá upphafi starfs til starfsloka; starfsumsóknir, ráðningar, starfsmannasamtöl, símenntun og réttindamál.

Um 400 íslensk fyrirtæki nota H3 lausnina, þar á meðal um 35 sveitarfélög. Tölvumiðlun er eitt elsta hugbúnaðarfyrirtæki landsins, stofnað árið 1985. Þar starfar samhentur hópur sérfræðinga sem þjónustar notendur H3, SFS fjárhagskerfisins auk annarra hugbúnaðarkerfa.

Orkuveita Reykjavíkur er veitu- og þjónustufyrirtæki í eigu þriggja sveitarfélaga. Fyrirtækið framleiðir, dreifir og selur heitt vatn og kalt, rafmagn og annast uppbyggingu og rekstur fráveitu og gagnaveitu. Að sögn Sólrúnar Kristjánsdóttir starfsmannastjóra mun H3 flýta vinnuferlum og auðvelda þátttöku stjórnenda í mannauðsmálum. „Kerfið er mjög einfalt í notkun og við bindum vonir við að það spari mikinn tíma og fyrirhöfn við ráðningaferlið á álagstímum, þjálfunarmál, umsýslu mannauðsmála og útborgun launa."

Bjarni Freyr Bjarnason, forstöðumaður hagmála hjá Orkuveitunni, telur að kerfið auki þjónustu við starfsfólk og stjórnendur til muna. „H3 verður tengt við Agresso-bókhaldskerfið okkar, sem er mikill kostur."