Flugáætlun Icelandair fyrir næsta ár sú stærsta í sögu félagsins

Flugáætlun Icelandair fyrir árið 2013 verður sú stærsta í sögu félagsins og um 15% umfangsmeiri en á þessu ári. Í tilkynningu frá félaginu segir:

Flug verður hafið til þriggja nýrra áfangastaða og ferðum er fjölgað til ýmissa borga í Bandaríkjunum og Evrópu. Gert er ráð fyrir að farþegar félagsins verði hátt í 2,3 milljónir á árinu 2013, en samkvæmt áætlunum verða þeir rétt yfir 2 milljónum á árinu 2012. Alls verða 18 Boeing-757 flugvélar nýttar til áætlunarflugsins næsta sumar, tveimur fleiri en á þessu ári. Samkvæmt áætluninni verður vöxturinn meiri yfir vetrarmánuðina en yfir sumarið og er það í takt við stefnu félagsins að draga úr árstíðasveiflum í rekstrinum.

Ef umfangsmikil breyting verður á skattaumhverfi ferðaþjónustunnar á næsta ári mun félagið þurfa að breyta áherslum með því að gera ráð fyrir færri ferðamönnum til Íslands en nú er áætlað en hlutfallslega fleiri tengifarþegum milli Evrópu og Norður-Ameríku.

„Áætlanir okkar fyrir 2012 eru að ganga eftir og markaðsrannsóknir gefa til kynna möguleika til vaxtar á næsta ári sem við ætlum að nýta", segir Birkir Hólm Guðnason, framkvæmdastjóri Icelandair. Auk tveggja vikulegra ferða til nýju áfangastaðanna, Anchorage, St. Pétursborgar og Zurich mun Icelandair fjölga ferðum næsta sumar til Washington, Denver og Boston í Bandaríkjunum, til Munchen, Parísar og Amsterdam á meginlandi Evrópu og til London Gatwick og Glasgow á Bretlandseyjum.

Alls verða áfangastaðirnir 35 á næsta ári, 10 í Norður-Ameríku og 25 í Evrópu.

Icelandair byggir leiðakerfi sitt á staðsetningu landsins mitt á milli Norður-Evrópu og Norður-Ameríku. Með leiðakerfinu er Icelandair unnt að þjóna þremur mörkuðum; heimamarkaðinum á Íslandi, ferðamannamarkaðinum til Íslands og alþjóðlega markaðinum milli Evrópu og Norður-Ameríku.

„Mikill vöxtur er á ferðamannamarkaðinum til Íslands á þessu ári. Ferðir Íslendinga til útlanda hafa vaxið jafnt og þétt frá 2009 og gert er ráð fyrir að sú þróun muni halda áfram. Þá hefur Icelandair náð mjög góðum árangri á þessu ári, líkt og á undanförnum tveimur árum, á þriðja markaðinum sem félagið starfar á, þ.e. á Norður-Atlantshafsmarkaðinum og þar eru tækifæri til að styrkja markaðsstöðu Icelandair enn frekar á næsta ári með nýjum áfangastöðum og aukinni tíðni", segir Birkir.

Mikill vöxtur hefur verið í starfsemi Icelandair á undanförnum árum. Vegna efnahagskreppunnar var dregið úr starfseminni árið 2008, en á tímabilinu 2009 til 2013 er vöxturinn í framboði Icelandair um 66% og farþegum fjölgað úr 1,3 milljónum í áætlaðar 2,3 milljónir á næsta ári.

Flugið til Anchorage hefst 15. maí og flogið verður tvisvar í viku til 15. september. Alaska er stærsta fylki Bandaríkjanna að flatarmáli. Íbúar eru rúmlega 700 þúsund og þar af 400 þúsund í Anchorage og nágrenni. Alaska býr yfir miklum náttúruauðlindum og ferðaþjónusta sem byggir á stórbrotinni óspilltri náttúru er ein helsta atvinnugreinin.

Flug til Anchorage frá Íslandi tekur rúmlega 7 klukkustundir, sem er lítið eitt styttra en t.d. flug til Seattle og Denver. Flugleiðin liggur í norðurátt frá Íslandi, yfir pólsvæðið.

„Töluverður straumur flugfarþega er á milli Evrópu og Alaska, bæði vegna öflugs atvinnulífs, sem m.a. byggir á fiskveiðum og olíu og gasvinnslu, og vegna ferðaþjónustu, en Alaska er mikil útivistarparadís. Þessir farþegar þurfa að millilenda í Bandaríkjunum á leið sinni. Með því að millilenda á Íslandi í staðinn geta þeir stytt ferðatíma sinn um þrjár klukkustundir eða meira", segir Birkir.

Flugið til St. Pétursborgar hefst 1. júní og flogið verður tvisvar í viku til 17. september. Þetta er í fyrsta sinn sem boðið er upp á beint áætlunarflug á milli Íslands og Rússlands og því um tímamót í samgöngusögunni að ræða.

„Við erum að opna okkur og íslenskri ferðaþjónustu nýja leið inn á Rússlandsmarkað, sem er afar stór og vaxandi ferðamannamarkaður og um leið að bjóða Íslendingum nýjan og spennandi áfangastað í beinu flugi", segir Birkir. Þá er St. Pétursborg mikil ferðamannaborg sem einkennist af sögufrægum gömlum byggingum, mikilli listastarfsemi, fjölskrúðugu hótel- og veitingastaðaframboði og lifandi mannlífi. Íbúar eru um 5 milljónir.

Með fluginu nýtir Icelandair einnig þá möguleika sem felast í leiðakerfi félagsins og tengiflugi milli Rússlands og Bandaríkjanna. Þannig geta farþegar auðveldlega náð beinu áframhaldandi morgunflugi Icelandair til New York og Boston með aðeins um einnar klukkustundar tengitíma í Leifsstöð..

Flugið til Zurich verður tvisvar í viku frá 1. júní til 14. september.

„Flugið til og frá Zurich mun styrkja okkur á ferðamannamarkaðinum í Mið-Evrópu og jafnframt auka valkosti okkar í fluginu milli Norður-Ameríku og Evrópu. Auk þess er Zurich skemmtileg borg fyrir Íslendinga að heimasækja og frábær upphafsstaður fyrir Evrópuferðir", segir Birkir Hólm Guðnason, framkvæmdastjóri Icelandair.