Spáir því að verðbólgan aukist í 4,3%

Greining Íslandsbanka spáir því að vísitala neysluverðs (VNV) hækki um 0,8% í september frá mánuðinum á undan. Svo mikil hækkun milli mánaða hefur ekki verið síðan í apríl sl. Gangi spáin eftir mun verðbólgan aukast úr 4,1% í 4,3%.

Fjallað er um málið í Morgunkorni greiningarinnar. Þar segir að það sem helst móti spána að þessu sinni séu útsölulok, hækkun eldsneytisverðs á heimsmarkaði og gengislækkun krónunnar.

„Eins og jafnan í september gætir áhrifa útsöluloka og gerum við ráð fyrir að verð á fötum og skóm hækki um ríflega 5% milli mánaða (tæplega 0,3% áhrif í VNV). Að viðbættum öðrum neysluvörum eru heildaráhrif útsöluloka raunar til rúmlega 0,4% hækkunar VNV að mati okkar," segir í Morgunkorninu.

„Þá gerum við ráð fyrir að hækkandi eldsneytisverð, þar sem þróunin á heimsmarkaði bætist við veikingu krónu, hafi áhrif til rúmlega 0,2% hækkunar VNV í september. Einnig gerum við ráð fyrir lítilsháttar hækkun á húsnæðislið vísitölunnar í september (tæplega 0,1% áhrif í VNV)"