Málareksturinn í Icesave kostar 140 milljónir

Gert er ráð fyrir því að kostnaðurinn við málsvörnina í Icesave málinu kosti 140 milljónir króna. Þetta kemur fram í fjáraukalögum fyrir árið 2012 sem dreift var á Alþingi í dag. Auk 140 milljóna króna sem fara í málareksturinn sjálfan er óskað eftir 13 milljóna króna framlagi til þess að kynna sjónarmið Íslands erlendis.

Icesave málið var flutt í Lúxemborg fyrr í þessari viku, eftir margra mánaða undirbúning. Aðalmálflytjandi Íslands er hinn breski Tim Ward en auk hans hafa fjölmargir íslenskir sérfræðingar tekið þátt í málsvörninni. Búist er við því að niðurstaða liggi fyrir áður en árið er á enda.