Þurfa að endurgreiða Saga Capital 125 milljónir

Hvarfi eignarhaldsfélagi ehf. var dæmt í morgun í Héraðsdómi Reykjavíkur til að endurgreiða Saga Capital tæplega 125 milljónir króna, sem eru hluti af greiðslu sem Hvarfi hafði innt af hendi vegna sjálfskuldarábyrgðar á efndum sjö lánssamninga.

Málið snérist um það hvort lánssamningar Icebank hf., og þeirra sjö einkahlutafélaga sem tóku lán hjá bankanum í apríl 2007, hafi falið í sér skuldbindingar í erlendri mynt eða hvort lánin hafi verið í íslenskum krónum og fjárhæð þeirra bundin við gengi þeirra gjaldmiðla sem tilgreindir voru í samningunum.

Talið var að undirliggjandi lánssamningar hefðu falið í sér ólögmæta gengistryggingu og eigendur Hvarfa töldu af þeirri ástæðu að þeir hefðu greitt meira en rétt hefði verið miðað við að lánin væru í íslenskum krónum.

Því var hinsvegar hafnað að lánveitanda hefði verið heimilt að gengistryggja umrædd lán þar sem þau hefðu verið lántakendum til hagsbóta enda væri ekki um slíkt að ræða í merkingu laga um vexti og verðtryggingu. Þá var því jafnframt hafnað að fyrirvaralaus greiðsla Hvarfa á ábyrgðinni ætti að koma í veg fyrir endurgreiðslu.